ഏറ്റവും പുതിയ വാർത്തകൾ വായിക്കാം

|JACOB CHERIAN|

മണിമലയാറ്റിലെ വെള്ളപ്പൊക്കത്തിന് കാരണമാകുന്ന തോണ്ടറക്കടവിലെ മൺപുറ്റ് നീക്കം ചെയ്യണം-വിക്ടർ ടി തോമസ്.

◾പത്തനംതിട്ട  ചെറിയ മഴക്കാലത്ത് പോലും മണിമലയാറ്റിലെ വെള്ളപ്പൊക്കത്തിനു കാരണമാകുന്ന ആറിന് കുറുകെയുള്ള തോണ്ടറക്കടവിലെ മണൽപുറ്റ് അടിയന്തരമായി നീക്കം ചെയ്യണമെന്ന് കേരള കോൺഗ്രസ് ജില്ലാ പ്രസിഡണ്ട് വിക്ടർ ടി തോമസ് ആവശ്യപ്പെട്ടു. യൂത്ത് ഫ്രണ്ട് ജില്ലാ കമ്മിറ്റിയുടെ നേതൃത്വത്തിൽ മണിമലയാറ്റിലെ തൊണ്ടറക്കടവിൽ നദിക്ക് മുകളിലുള്ള മണൽ പുറ്റിൽ  നടത്തിയ പ്രതിഷേധ കൂട്ടായ്മ ഉദ്ഘാടനം ചെയ്യുകയായിരുന്നു വിക്ടർ. മൂന്ന് ദശാബ്ദ കാലം മുമ്പ് തിരുവല്ല പബ്ലിക് സ്റ്റേഡിയം നിർമ്മാണത്തിന് ആവശ്യമായ മണൽ എടുക്കുന്നതിനായി വന്ന മണ്ണുമാന്തിയന്ത്രം തൊണ്ടറ കടവിലെ മണൽ പുറ്റ് കാരണം കടന്നുവരുവാൻ പ്രയാസപ്പെട്ടിരുന്നു. അന്ന് ആറിന്റെ തെക്കുവശത്ത് ഡ്രൈജിംഗ് നടത്തിയാണ് യന്ത്രം മറുവശത്തേക്ക് കടത്തിവിട്ടത്.  അതിനുശേഷം ഉണ്ടായ വെള്ളപ്പൊക്കങ്ങളും പ്രളയവും മൂലം ഈ ഭാഗത്ത് വീണ്ടും തടികളും മറ്റും വന്ന് അടിഞ്ഞ് മണൽ കുന്നു കൂടിയിരിക്കുകയാണ്. ഈ മണൽ പൂറ്റിന് മുകളിൽ വലിയ മരങ്ങൾ വളർന്നു നിൽക്കുന്നു. ഈ മണൽ പുറ്റ് അടിയന്തരമായി നീക്കം ചെയ്യാത്തപഷം ചെറിയ വെള്ളപ്പൊക്കത്തിൽ പോലും ഈ പ്രദേശം വെള്ളത്തിനടിയിലാവാൻ സാധ്യതയുണ്ടെന്നും അദ്ദേഹം പറഞ്ഞു.യൂത്ത് ഫ്രണ്ട് ജില്ലാ പ്രസിഡണ്ട് ബിനു കുരുവിള അധ്യക്ഷത വഹിച്ചു. 

കേരള കോൺഗ്രസ് സംസ്ഥാന സെക്രട്ടറിയേറ്റ് മെമ്പർ തമ്പി കുന്നുകണ്ടത്തിൽ, യൂത്ത് ഫ്രണ്ട് സംസ്ഥാന ജനറൽ സെക്രട്ടറി  വി ആർ രാജേഷ്, ജോ ഇലഞ്ഞിമൂട്ടിൽ, മാത്യു മുളമൂട്ടിൽ, കെ എസ് എബ്രഹാം, ജോസ് തേക്കാട്ടിൽ, ഏലിയാസ് പൊയിപ്പാട്ടിൽ, ടോണി കുര്യൻ, സണ്ണി തോമസ് വളയിൽ, ടോണു കുന്നുകണ്ടതിൽ, രാജു വാലുപറമ്പിൽ, തോമസുകുട്ടി കയ്യാല പറമ്പിൽ,അലക്സ്‌ വടക്കേടത്തു യൂത്ത് ഫ്രണ്ട് യുഎഇ പ്രസിഡണ്ട്, മനീഷ് മാത്യു എന്നിവർ പ്രസംഗിച്ചു

പത്തനംതിട്ട ജില്ലയിൽ ടിപ്പറുകള്‍ക്ക് നിരോധനം

◾ശബരിമല മകരവിളക്ക് ഉത്സവ സമയത്ത് ജില്ലയില്‍ ഉണ്ടാകുവാന്‍ സാധ്യതയുളള വാഹന ബാഹുല്യം പരിഗണിച്ച് ശബരിമല തീര്‍ഥാടകരുടെയും പൊതുജനങ്ങളുടെയും ജീവനും അവരുടെ വാഹനങ്ങള്‍ക്കും സുരക്ഷ ഉറപ്പാക്കുന്നതിന് മോട്ടോര്‍ വാഹന നിയമ പ്രകാരം ജനുവരി 13,14,15 എന്നീ ദിവസങ്ങളില്‍ എല്ലാ തരത്തിലുമുളള ടിപ്പര്‍ ലോറികളുടെയും ഗതാഗതം പത്തനംതിട്ട ജില്ലയിലെ റോഡുകളില്‍ നിരോധിച്ച് ജില്ലാ കളക്ടര്‍ ഡോ.ദിവ്യ എസ് അയ്യര്‍ ഉത്തരവായി. ഉത്തരവ് നടപ്പാക്കുന്നതിന് ജില്ലാ പോലീസ് മേധാവി, റീജിയണല്‍ ട്രാന്‍സ്പോര്‍ട്ട് ഓഫീസര്‍, റീജിയണല്‍ ട്രാന്‍സ്പോര്‍ട്ട് ഓഫീസര്‍ (എന്‍ഫോഴ്സ്മെന്റ്) എന്നിവരെ ചുമതലപ്പെടുത്തി. നിയമം ലംഘിക്കുന്നവര്‍ക്കെതിരെ ശക്തമായ നിയമനടപടി സ്വീകരിക്കും.

"സൈബർ കാലത്തെ മലയാളി "പ്രഭാഷണം ഇന്ന്

◾സാഹിത്യ സാംസ്കാരിക സംഘടനയായ ട്രാവൻകൂർ കൾച്ചറൽ ആൻറ് ലിറ്റററി സർക്കിളിൻ്റെ ആഭിമുഖ്യത്തിൽ തിരുവല്ല വൈ.എം.സി.എ ഹാളിൽ ഇന്ന് വൈകിട്ട് 4ന് "സൈബർ കാലത്തെ മലയാളി " എന്ന വിഷയത്തെ അധികരിച്ച് ശാസ്ത്ര ഗവേഷകനും, എഴുത്തുകാരനുമായ എതിരൻ കതിരവൻ പ്രഭാഷണം നടത്തും.ഓട്ടോകാസ്റ്റ് ചെയർമാൻ അലക്സ് കണ്ണമല ഉദ്ഘാടനം ചെയ്യും.റിട്ട. അദ്ധ്യാപകനും, പരിസ്ഥിതി പ്രവർത്തകനുമായ ബാലകൃഷ്ണൻ നായരെ ചടങ്ങിൽ ആദരിക്കും.

തിരുവല്ല വൈ.എം.സി.എയുടെ ആഭിമുഖ്യത്തിൽ ബാലകലാമേള നടന്നു.

◾പുഷ്പഗിരി ഹോസ്പിറ്റൽ സി.ഡി.സി ഡോ.മഞ്ജു ജോർജ്ജ് മേളയുടെ ഉദ്ഘാടനം നിർവ്വഹിച്ചു.വൈ.എം.സി.എ പ്രസിഡൻ്റ് ഷിബു പുതുക്കേരിൽ അദ്ധ്യക്ഷത വഹിച്ചു.  ഫ്രാൻക്ലിൻ, ജോയി ജോൺ, ടി.സി. ജേക്കബ്, പ്രൊഫ.പ്രസാദ് തോമസ് കോടിയാട്ട് ,ലിജോ ജോസ്, ജോർജ്ജ് വറുഗീസ്, ഇ.എ.ഏലിയാസ്, തോമസ് വറുഗീസ്, ജോർജ്ജ് മാത്യു എന്നിവർ പ്രസംഗിച്ചു

പത്തനംതിട്ട ജില്ലയില്‍ 10,31,218 വോട്ടര്‍മാര്‍; വോട്ടര്‍മാരില്‍ കൂടുതല്‍ സ്ത്രീകൾ

◾അന്തിമ വോട്ടര്‍ പട്ടികയില്‍ ജില്ലയില്‍ ഉള്ളത് 10,31218 വോട്ടര്‍മാര്‍. കഴിഞ്ഞ വര്‍ഷം പ്രസിദ്ധീകരിച്ച വോട്ടര്‍ പട്ടികയെ അപേക്ഷിച്ച് 1,9,531 വോട്ടര്‍മാരുടെ കുറവാണുള്ളത്. 5,42,665 സ്ത്രീ വോട്ടര്‍മാരും 4,88,545 പുരുഷ വോട്ടര്‍മാരുമാണ് പട്ടികയില്‍ ഉള്ളത്. എട്ടു ഭിന്നലിംഗ വിഭാഗക്കാരും ജില്ലയില്‍ നിന്ന് ഉണ്ട്. 5,779 വോട്ടര്‍മാരാണ് പുതുതായി പട്ടികയില്‍ ഇടം നേടിയിരിക്കുന്നത്.2,227 പ്രവാസി വോട്ടര്‍മാരാണുള്ളത്. ആറന്മുളയില്‍ നിന്നാണ് ഏറ്റവും കൂടുതല്‍ പ്രവാസി വോട്ടര്‍മാര്‍ ഉള്ളത്. 728 പേര്‍. തിരുവല്ലയില്‍ നിന്ന് 520 ഉം, റാന്നി 362 ഉം, കോന്നി 325 ഉം, അടൂര്‍ 292 ഉം പ്രവാസി വോട്ടര്‍മാരുണ്ട്.

തിരുവല്ലയില്‍ ആകെ 2,07,509 വോട്ടര്‍മാര്‍ ഉള്ളതില്‍ 98,600 പുരുഷന്മാരും 1,08,908 സ്ത്രീകളും ഭിന്നലിംഗത്തില്‍പ്പെടുന്ന ഒരാളും ഉള്‍പ്പെടുന്നു. റാന്നിയില്‍ ആകെ 1,88,837 വോട്ടര്‍മാര്‍ ഉള്ളതില്‍ 90,943 പുരുഷന്മാരും 97,892 സ്ത്രീകളും ഭിന്നലിംഗത്തില്‍പ്പെടുന്ന രണ്ടുപേരും ഉള്‍പ്പെടുന്നു. 

ചങ്ങനാശ്ശേരി ജോയിന്റ് ആർ.ടി.ഒ ഓഫീസിൽ വിജലൻസ് റെയ്ഡ്.

◾ഇന്നലെ വൈകിട്ട് കോട്ടയം വിജിലൻസ് യൂനിറ്റ് എസ്.പി  വി.ജി വിനോദ് കുമാറിന്റെ നേതൃത്വത്തിലാണ് മിന്നൽ പരിശോധന നടന്നത്. ഓഫീസിലെ ഉദ്യോഗസ്ഥയുടെ പക്കൽ നിന്നും 2,600 രൂപയും, ഏജന്റെന്മാരിൽ നിന്നും 31,600 രൂപയും പരിശോധനയിൽ പിടിച്ചെടുത്തു. ഏജൻറന്മാരായ വി വി ബിജുവിന്റെ പക്കൽ നിന്നും 26,100 രൂപയും, പി.പി. ജയലാലിൽ നിന്നും 10,000 രൂപയുമാണ് പിടിച്ചെടുത്തത്. വിജിലൻസ് ഡി.വൈ.എസ്.പി രവികുമാർ, ഇൻസ്പക്ടർ ഗിരീഷ്, എസ്.ഐമാരായ പ്രസാദ്, ജോൺസൺ, എ.എസ്.ഐ അനിൽകുമാർ, സീനിയർ സിവിൽ പോലീസ് ഓഫീസർ ഷമീർ, സിവിൽ പോലീസ് ഓഫീസറന്മാരായ            അനിൽ.കെ.സോമൻ, സൂരജ്, സുരേഷ് എന്നിവർ എസ്.പി യോടൊപ്പമുണ്ടായിരുന്നു

നിർധനരായ രോഗികൾക്കുള്ള ഡയാലിസിസ് കിറ്റുകളുടെ വിതരണം നടത്തി.

◾പരുമല : ലയൺസ് ക്ലബ് ഓഫ് ട്രാവൻകൂർ എമിറേറ്റ്സ്, ലയൺസ് ക്ലബ് ഓഫ് തിരുവല്ല എയ്ഞ്ചൽസ് എന്നിവയുടെ ആഭിമുഖ്യത്തിൽ നിർധനരായ ഡയാലിസിസ് രോഗികൾക്കുള്ള ഡയാലിസിസ് കിറ്റുകളുടെ വിതരണം നടന്നു. പരുമല പി എച്ച് സി യിൽ നടന്ന ചടങ്ങ് ലയൺസ് ഡിസ്ട്രിക്ട് ഗവർണർ സണ്ണി വി സക്കറിയ ഉദ്ഘാടനം ചെയ്തു. ആറു മാസത്തേക്കുള്ള ഡയാലിസിസ് കിറ്റുകളാണ് ചടങ്ങിൽ വിതരണം ചെയ്തത്.

കടപ്ര ഗ്രാമപഞ്ചായത്ത് പ്രസിഡന്റ് നിഷ അശോകൻ അധ്യക്ഷത വഹിച്ചു. ലയൺസ് ക്ലബ് ട്രാവൻകൂർ എമിറേറ്റ്സ് പ്രതിനിധി പ്രശാന്ത് വിദ്യാധരൻ സ്വാഗതം ആശംസിച്ചു.ആർ വെങ്കിടാചലം, ശിവദാസ് യു പണിക്കർ, സജി എബ്രഹാം സാമുവൽ, ഗ്രാമപഞ്ചായത്ത് അംഗങ്ങളായ റോബിൻ പരുമല സോജിത് സോമൻ, കടപ്ര പി എച്ച് സി മെഡിക്കൽ ഓഫീസർ ഡോക്ടർ ലക്ഷ്മി ദിവാകർ, മേഴ്സി എബ്രഹാം മാർട്ടിൻ ഫ്രാൻസിസ്, പിസി ചാക്കോ, സുരേഷ് കുറുപ്പ് ജോർജ് തോമസ് എന്നിവർ സംസാരിച്ചു

നിര്യാതനായി.

◾റയിൽവേ റിട്ട. ഉദ്യോഗസ്ഥൻ തിരുവല്ല കുറ്റൂർ -തെങ്ങേലി വെൺപാല വീട്ടിൽ വി.എ.ഏബ്രഹാം (മാത്തുക്കുട്ടി - 81) നിര്യാതനായി. സംസ്കാരം 8 ഞായർ ഉച്ചയ്ക്ക് രണ്ടിന് വസതിയിലെ ശുശ്രൂഷയ്ക്ക് ശേഷം തെങ്ങേലി സെൻറ് മേരീസ് ക്‌നാനായ പള്ളി സെമിത്തേരിയിൽ. 

ഭാര്യ.. വെൺപാല തച്ചുവേലിൽ കുന്നേൽ കുടുംബാംഗം പരേതയായ അച്ചാമ്മ. മക്കൾ: കേണൽ സുനിൽ ഏബ്രഹാം, സുധ (അദ്ധ്യാപിക - പാറ്റ്ന)മരുമക്കൾ: ഡോ.അജീഷ, എബി മാത്യു (സി.ബി.ഐ - പാറ്റ്ന )

ഇലന്തൂർ നരബലി കേസിൽ ആദ്യ കുറ്റപത്രം ഇന്ന്.

◾തമിഴ്നാട് സ്വദേശിനി പത്മയെ ഇലന്തൂരിൽ കൊലപ്പെടുത്തിയ കേസിലെ ആദ്യ കുറ്റപത്രം എറണാകുളം ജുഡീഷ്യൽ ഒന്നാം ക്ലാസ്സ് മജിസ്ട്രേറ്റ് കോടതിയിൽ ഇന്ന് സമർപ്പിക്കും. മുഖ്യ പ്രതി ഷാഫിയടക്കം മൂന്ന് പ്രതികളുള കേസിൽ 150 സാക്ഷികളാണുള്ളത്. ഒന്നാം പ്രതി ഷാഫിയും, രണ്ടും മൂന്നും പ്രതികളായി പാരമ്പര്യ ചികിത്സ നടത്തുന്ന ഇലന്തൂരിലെ ഭഗവൽ സിംഗ്, ഇയാളുടെ ഭാര്യ ലൈല എന്നിവരാണ് കേസിൽ ഉൾപ്പെട്ടിട്ടുള്ളത്. കൊലപാതകം, ഗൂഡാലോചന,തട്ടിക്കൊണ്ടു പോകൽ തുടങ്ങി ഒട്ടേറെ കുറ്റങ്ങളാണ് പ്രതികളിൽ ചുമത്തിയിരിക്കുന്നത്. പ്രതികൾക്ക് വധശിക്ഷ ഉറപ്പാക്കുകയെന്ന ലക്ഷ്യത്തോടെ അപൂർവ്വങ്ങളിൽ അപൂർവമായ കേസാണിതെന്ന് കുറ്റപത്രത്തിൽ പരാമർശിച്ചിരിക്കുന്നു

സാക്ഷ്യപത്രം സമർപ്പിക്കണം.

◾കല്ലൂപ്പാറ ഗ്രാമപഞ്ചായത്തിലെ ജനുവരി ഒന്നിന് 60 വയസ് പൂര്‍ത്തിയാകാത്ത വിധവാ, അവിവാഹിത പെന്‍ഷന്‍ ഗുണഭോക്താക്കള്‍ പുനര്‍ വിവാഹം ചെയ്തിട്ടില്ല എന്ന സാക്ഷ്യപത്രം ജനുവരി 15 നകം പഞ്ചായത്ത് ഓഫീസില്‍ സമര്‍പ്പിക്കണമെന്ന് സെക്രട്ടറി അറിയിച്ചു

എരുമേലി ചന്ദനക്കുടം പേട്ടതുള്ളൽ ഒരുക്കങ്ങൾ പൂർത്തിയായി.

◾ജനുവരി 10, 11 തീയതികളിൽ നടക്കുന്ന എരുമേലി ചന്ദനക്കുടം, പേട്ടതുള്ളൽ എന്നിവയുടെ ഒരുക്കങ്ങളാണ് പൂർത്തിയായത്. 10 ന് വൈകിട്ട് 4 ന് ജമാഅത്ത് ഭാരവാഹികൾ, ദേവസ്വം ബോർഡ് അമ്പലപ്പുഴ- ആലങ്ങാട്ട് സംഘങ്ങൾ, വിവിധ മതസംഘടനകൾ എന്നിവരുടെ സംയുക്ത സൗഹൃദ സംഗമം എരുമേലി പള്ളി ആഡിറ്റോറിയത്തിൽ നടക്കും. വൈകിട്ട് 6ന് പൊതുസമ്മേളനം മന്ത്രി വി.എൻ.വാസവൻ ഉദ്ഘടനം ചെയ്യും. തുടർന്ന് ചന്ദനക്കുട ഘോഷയാത്ര പള്ളിയങ്കണത്തിൽ നിന്നും ആരംഭിച്ച് ചരള, പേട്ട കവല, കൊച്ചമ്പലം, സ്ഥാപനങ്ങൾ എന്നിവിടങ്ങളിൽ സ്ഥാപനങ്ങളുടെയും, സംഘടനകളുടെയും സ്വീകരണങ്ങൾ ഏറ്റുവാങ്ങി 11.50 ന് വലിയമ്പലത്തിലെത്തി സ്വീകരണം ഏറ്റുവാങ്ങും. ഇതിനു ശേഷം പോലീസ് സ്‌റ്റേഷനിലെ സ്വീകരണം വാങ്ങി കെ.എസ്.ആർ.ടി.സി ജംഗ്ഷൻ, ടി.ബി.റോഡ് 'ചെമ്പകത്തുങ്കൽ പാലം കടന്ന് പുലർച്ചെ 2.30 ന് പള്ളിയങ്കണത്തിൽ സമാപിക്കും.രണ്ടാനകളാണ് ഘോഷയാത്രയിൽ പങ്കെടുക്കുക. ചെണ്ടമേളം, ബാൻഡ്സെറ്റ്, ശിങ്കാരിമേളം, കഥകളി എന്നിവ  ഘോഷയാത്രയ്ക്ക് മികവേകും. പേട്ടതുള്ളൽ അമ്പലപ്പുഴ സംഘത്തിന്റെ നേതൃത്വത്തിൽ രാവിലെ 10.30 ന് ആരംഭിക്കും.200 പേർ പങ്കെടുക്കുന്ന പേട്ടതുള്ളൽ ഉച്ചക്ക് 1 മണിക്ക് അമ്പലപ്പുഴ സംഘം ധർമ്മശാസ്ത ക്ഷേത്രത്തിൽ പ്രവേശിക്കും. 3 മണിക്ക് ആലങ്ങാട്ട് സംഘത്തിന്റെ പേട്ടതുള്ളൽ ആരംഭിച്ച് വൈകിട്ട് 6.30ന് ക്ഷേത്രത്തിൽ പ്രവേശിക്കും.

ഭാര്യയുടെ മുഖത്ത് ആസിഡ് ഒഴിച്ച ഭർത്താവിന് 10 വർഷം കഠിനതടവ്. 

◾സംശയരോഗത്തെ തുടർന്ന് ഭാര്യയുടെ മുഖത്ത് ആസിഡ് ഒഴിച്ച പത്തനംതിട്ട ചെന്നീർക്കര പ്രക്കാനം വല്യവട്ടം തുണ്ടിയിൽ രതീഷിനെയാണ് പത്തനംതിട്ട അഡീഷണൽ ഡിസ്ട്രിക്ട് ആന്റ് സെഷൻസ് കോടതി ജഡ്ജി പി.പി.പൂജ 10 വർഷം തടവും, 5 ലക്ഷം രൂപ പിഴയും ശിക്ഷിച്ചത്. 2016 ജനവരി 13ന് വൈകിട്ട് 6.50നാണ് കേസിനാസ്പദമായ സംഭവം നടന്നത്. ഓമല്ലൂർ ചന്തയ്ക്ക് സമീപമുള്ള അക്ഷയ സെന്ററിലെ ജീവനക്കാരിയായ ഭാര്യ രഞ്ജുവിന്റെ മുഖത്ത് പ്രക്കാനം ജംഗ്ഷനിൽ വച്ചാണ് ഹോട്ടൽ ജീവനക്കാരനായ രതീഷ് ആസിഡ് ഒഴിച്ചത്.രതീഷിന്റെ നിരന്തരമുള്ള ഉപദ്രവം സഹിക്കാനാവാതെ പിണക്കത്തിലായ  ഭാര്യ സ്വന്തം വീട്ടിൽ പോകാനിറങ്ങിയപ്പോഴാണ് പ്രതി ആസിഡ് ഒഴിച്ചത്.ഇതേ തുടർന്ന് പത്തനംതിട്ട ജനറൽ ആശുപത്രിയിൽ രഞ്ജുവിനെ എത്തിച്ചുവെങ്കിലും പരിക്ക് ഗുരുതരമായതിനാൽ കോട്ടയം മെഡിക്കൽ കോളജ് ആശുപത്രിയിലേക്ക് മാറ്റുകയായിരുന്നു.

ശബരിമല സന്നിധാനത്ത് വെടിപ്പുരയ്ക്ക് തീപിടിച്ച അപകടത്തിൽ പൊള്ളലേറ്റ യാൾ മരിച്ചു.

◾ചികിത്സയിലായിരുന്ന ചെറിയനാട് തോന്നയ്ന്നൽ ചേറ്റുവശ്ശേരി വടക്കേതിൽ എ.ആർ.ജയകുമാ(47)റാണ് മരിച്ചത്.സന്നിധാനത്ത് വെടിവഴിപാടിനുള്ള കതിന

നിറയ്ക്കുന്നതിനിടെയാണ് ജയകുമാർ ഉൾപ്പടെ മൂന്ന് പേർക്ക് പൊള്ളലേറ്റിരുന്നു

ഇതിൽ ചെങ്ങന്നൂർ സ്വദേശികളായ രജീഷ്, അമൽ എന്നിവരുടെ ആരോഗ്യനില തൃപ്തികരമാണെന്നാണ് മൂവർക്കും ചികിത്സ നൽകി വന്ന കോട്ടയം മെഡിക്കൽ കോളജ് ആശുപത്രി അധികൃതർ പറയുന്നത്.'

ലിസ് ജയ്മോൻ ജേക്കബ് - മിസ് കേരള 2022

◾കോട്ടയം സ്വദേശിനി ലിസ് മിസ് കേരള 2022-ായി തെരഞ്ഞെടുക്കപ്പെട്ടു.

ഗുരുവായൂർ സ്വദേശിനി ശംഭവിയാണ് റണ്ണർ അപ്പ്.

ഗുലാം നബി ആസാദിനൊപ്പം കോൺഗ്രസ് വിട്ട 17 പേർ തിരികെ പാർട്ടിയിലെത്തി.

◾പാർട്ടിയിലേക്ക് തിരിച്ചെത്തിയ കാശ്മീർ മുൻ ഉപമുഖ്യമന്ത്രി താരാ ചന്ദ്' മുൻപി.സി.സി അദ്ധ്യക്ഷൻ പീർ സാദാ മുഹമ്മദ് സയിദ് എന്നിവർ ഉൾപ്പടെയുള്ള 17 നേതാക്കളെ ദേശീയ ജനറൽ സെക്രട്ടറി കെ.സി വേണുഗോപാൽ എന്നെ.സി.സി ആസ്ഥാനത്ത് നടന്ന ചടങ്ങിൽ പാർട്ടിയിലേക്ക് സ്വാഗതം ചെയ്തു. ജീവിതത്തിലെ ഏറ്റവും വലിയ മണ്ടത്തരമാണ് കോൺഗ്രസ് വിട്ടതിലൂടെ തനിക്ക് സംഭവിച്ചതെന്ന് താരാ ചന്ദും, ജനങ്ങളോട് മാപ്പ് പറയുന്നതായും ഭാരത് ജോഡോ യാത്ര പുത്തൻ പ്രതീക്ഷ നൽകുന്നതായും പീർ സാദാ മുഹമ്മദ് സയിദും പറഞ്ഞു.

കുടുംബാംഗങ്ങളെ വീട്ടിനുള്ളിൽ മരിച്ച നിലയിൽ കണ്ടെത്തി.

◾തിരുവനന്തപുരം കഠിനംകുളം സ്വദേശി രമേശ്, ഭാര്യ സുലജ, മകൾ രേഷ്മ എന്നിവരെയാണ് ഇന്നലെ വീടിനുള്ളിൽ തീ പൊള്ളലേറ്റ് മരിച്ച നിലയിൽ കണ്ടത്. സാമ്പത്തിക പ്രശ്നങ്ങളാണ് സംഭവത്തിന് പിന്നിലെന്നാണ് പ്രാഥമിക നിഗമനം.ഗൾഫിൽ നിന്നും കഴിഞ്ഞ ദിവസമാണ് രമേശ് നാട്ടിലെ വീട്ടിലെത്തിയത്.

ചാൻസർ ബിൽ രാഷ്ട്രപതി ദ്ദവനിലേക്ക്   

◾ചാൻസർ ബിൽ രാഷ്ട്രപതിയുടെ പരിഗണനയ്ക്ക് വിടാൻ ഗവർണർക്ക് നിയമോപദേശം.ഇതേ തുടർന്ന് ബിൽ രാഷ്ട്രപതിക്ക് വിടാൻ രാജ്ഭവൻ ഒരുക്കം തുടങ്ങി.

വിദ്യാഭ്യാസം കൺകറന്റ് പട്ടികയിൽ ഉള്ളതിനാൽ സംസ്ഥാനങ്ങൾക്ക് മാത്രം തീരുമാനം കൈക്കൊള്ളാനാവില്ലെന്ന നിലപാടിലാണ് ഗവർണർ.
14 സർവ്വകലാശാലകളുടെയും ചാൻസലർ സ്ഥാനത്തു നിന്നും ഗവർണറെ നീക്കം ചെയ്യുന്നതാണ് ബിൽ. രാഷ്ട്രപതിയുടെ പരിഗണനയ്ക്ക് ബിൽ വിട്ടാൽ ഇതിന്മേൽ തീരുമാനം വൈകാനാണ് സാധ്യത. എന്നാൽ തീരുമാനം നീട്ടിക്കൊണ്ടുപോകാനാണ് ഗവർണറുടെ നടപടിയെങ്കിൽ കോടതിയെ സമീപിക്കാനും സർക്കാരിന്റെ ആലോചനയിലുണ്ട്.

കാലിക്കറ്റ് വി.സിയെ പുറത്താക്കാൻ  ക്വാവാറണ്ടോ ഹർജി.

◾സുപ്രീം കോടതി വിധിക്ക് വിരുദ്ധമായി നിയമനം ലഭിച്ച കാലിക്കറ്റ് സർവ്വകലാശാല വൈസ് ചാൻസലർ ഡോ.എം.കെ.ജയരാജനെ പുറത്താക്കണമെന്നാവശ്യപ്പെട്ട് കാലിക്കറ്റ് സർവ്വകലാശാല സെനറ്റ് അംഗം ഡോ.ടി.മുഹമ്മദാലി ജസ്റ്റിസ് ദേവൻ രാമചന്ദ്രൻ മുമ്പാകെ ഹർജി നൽകിയത്.ഹർജി സ്വീകരിച്ചതോടെ എതിർകക്ഷി കാലിക്കറ്റ് വി.സിക്ക് പ്രത്യേക ദൂതൻ മുഖേന നോട്ടീസ് നൽകാൻ ഉത്തരവായി.

◾ബഫര്‍സോണ്‍ പരിധിയില്‍നിന്നു ഒഴിവാക്കാന്‍ അപേക്ഷ നല്‍കേണ്ട അവസാന തീയതി ഇന്ന്. ഇതുവരെ 54,607 പരാതികളാണ് ലഭിച്ചത്. 17,054 പരാതികളില്‍ പരിശോധന പൂര്‍ത്തിയാക്കി. നേരത്തെ ഉപഗ്രഹ സര്‍വേയില്‍ കണ്ടെത്തിയ 49,330 കെട്ടിടങ്ങള്‍ക്കു പുറമേ, പരിസ്ഥിതി ലോല മേഖലയില്‍ 64,000 നിര്‍മിതികള്‍കൂടി ഉണ്ടെന്നു കണ്ടെത്തി. സെര്‍വര്‍ തകരാറിലാകുന്നതാണ് വിവരങ്ങള്‍ അപ് ലോഡ് ചെയ്യാന്‍ തടസം.

◾ജഡ്ജിമാരെ നിയമിക്കുന്നതിനുള്ള സുപ്രീം കോടതി കൊളീജിയത്തിന്റെ 104 ശുപാര്‍ശകള്‍ അംഗീകരിക്കാത്ത കേന്ദ്ര സര്‍ക്കാരിന്റെ നടപടിക്കെതിരേ കടുത്ത വിമര്‍ശനവുമായി സുപ്രീം കോടതി. കൊളീജിയത്തിന്റെ ശുപാര്‍ശകളില്‍ ഹൈക്കോടതി ജഡ്ജിമാരുടെ നിയമനത്തിനുള്ള 44 ശുപാര്‍ശകളില്‍ ഇന്നുതന്നെ അംഗീകാരം നല്‍കി സുപ്രീം കോടതിയില്‍ ഹാജരാക്കാമെന്നു സര്‍ക്കാര്‍ സമ്മതിച്ചു. രാജ്യത്തെ നിയമം പാലിക്കാന്‍ സര്‍ക്കാര്‍ തയാറാകണമെന്ന് സുപ്രീം കോടതി താക്കീതു നല്‍കി.

◾സംസ്ഥാന സ്‌കൂള്‍ കലോത്സവത്തില്‍ സ്വര്‍ണകപ്പിനായി ഇഞ്ചോടിഞ്ചു പോരാട്ടം. 874 പോയിന്റുമായി കോഴിക്കോട് മുന്നില്‍. 868 പോടിന്റുമായി കണ്ണൂര്‍ തൊട്ടുപിറകില്‍. പാലക്കാടിന് 859 പോയിന്റ്. സ്‌കൂളുകളില്‍ 149 പോയിന്റുമായി ആലത്തൂര്‍ ഗുരുകുലം സ്‌കൂളാണു മുന്നില്‍. 127 പോയിന്റുമായി തിരുവനന്തപുരം കാര്‍മല്‍ ഗേള്‍സ് പിറകിലുണ്ട്. കോടതി അപ്പീലുമായെത്തിയ 93 വിദ്യാര്‍ത്ഥികളുടെ മത്സരഫലം തടഞ്ഞുവച്ചിരിക്കുകയാണ്. കലോല്‍സവത്തിന് ഇന്നു കൊടിയിറങ്ങും.

◾ലെയിന്‍ ട്രാഫിക് കര്‍ശനമായി നടപ്പാക്കുമെന്ന് ഗതാഗത മന്ത്രി ആന്റണി രാജു. ഇതിനായി ബോധവല്‍ക്കരണ യജ്ഞം തുടങ്ങി. വാഹനങ്ങള്‍ നിര പാലിച്ച് ഓടിക്കണം. നിര്‍ദ്ദേശങ്ങള്‍ ലംഘിച്ച് ഓവര്‍ ടേക്കു ചെയ്യുന്നവര്‍ക്കെതിരെ കര്‍ശന നടപടി സ്വീകരിക്കും.

◾സാങ്കേതിക സര്‍വകലാശാലയില്‍ താല്‍ക്കാലിക ജീവനക്കാരെ നിയമിക്കാന്‍ രജിസ്ട്രാര്‍ ഇറക്കിയ വിജ്ഞാപനം ഗവര്‍ണര്‍ മരവിപ്പിച്ചു. ഗവര്‍ണര്‍ നിയമിച്ച താത്കാലിക വൈസ് ചാന്‍സലറുടെ അനുമതിയില്ലാതെ വിജ്ഞാപനം ഇറക്കിയതാണു കാരണം. മാനദണ്ഡങ്ങള്‍ പാലിക്കണമെന്നും വീഴ്ചയുണ്ടെങ്കില്‍ രജിസ്ട്രാര്‍ക്കെതിരേ നടപടിയെടുക്കണമെന്നും ഗവര്‍ണര്‍ നിര്‍ദേശിച്ചു.

◾ബത്തേരി നഗരത്തിലിറങ്ങിയ കാട്ടാനയെ കാട്ടിലേക്കു തുരത്താന്‍ കുംകിയാനകളെ ഉപയോഗിച്ചുള്ള ശ്രമങ്ങള്‍ വിജയിച്ചില്ല. രാത്രി ബത്തേരി നഗരത്തില്‍ വനം വകുപ്പ് ജീവനക്കാര്‍ കാവല്‍ ഒരുക്കി. ഉള്‍വനത്തിലേക്ക് തുരത്താന്‍ ഇന്നും ശ്രമിക്കും. ഗൂഡല്ലൂരില്‍ നിന്നുള്ള വനപാലക സംഘവും വയനാട്ടില്‍ തുടരും. മയക്കുവെടിവയ്ക്കാന്‍ അനുമതി തേടും. കാട്ടാനയുടെ ഭീഷണിമൂലം ബത്തേരി നഗരസഭയിലെ പത്ത് വാര്‍ഡുകളില്‍ നിരോധനാജ്ഞ പ്രഖ്യാപിച്ചിരിക്കുകയാണ്.

◾ബ്രൂവറിയില്‍നിന്ന് ആറു കെയ്സ് ബിയര്‍ മോഷ്ടിച്ച കേസില്‍ പാലക്കാട് എക്സൈസ് ഓഫീസര്‍ സി ടി പ്രിജുവിനെ സസ്പെന്‍ഡു ചെയ്തു. പാലക്കാട്ടെ കഞ്ചിക്കോടുള്ള ബ്രൂവറിയിലാണ് മോഷണം നടന്നത്.

◾ബഫര്‍സോണ്‍ വിഷയത്തില്‍ ഒരു നടപടിയും സ്വീകരിക്കാത്ത വനംമന്ത്രി എ.കെ. ശശീന്ദ്രനെ മന്ത്രിസഭയില്‍നിന്നു പുറത്താക്കണമെന്ന് പ്രതിപക്ഷ നേതാവ് വി.ഡി. സതീശന്‍. അല്ലാത്തപക്ഷം വനംവകുപ്പു ചുമതലയില്‍നിന്നു നീക്കി വിശ്രമവും വിനോദവും എന്ന വകുപ്പിന്റെ ചുമതല നല്‍കണമെന്ന് സതീശന്‍ ആവശ്യപ്പെട്ടു.

◾സംസ്ഥാന വ്യാപകമായി 485 സ്ഥാപനങ്ങളില്‍ ഭക്ഷ്യസുരക്ഷാ വകുപ്പ് പരിശോധന നടത്തി. വൃത്തിഹീനമായി പ്രവര്‍ത്തിച്ച പത്തും ലൈസന്‍സില്ലാത്ത ആറും സ്ഥാപനങ്ങള്‍ ഉള്‍പ്പെടെ 16 സ്ഥാപനങ്ങള്‍ അടച്ചു പൂട്ടിച്ചു. 162 സ്ഥാപനങ്ങള്‍ക്ക് നോട്ടീസ് നല്‍കി.

◾തൃശൂര്‍ ആസ്ഥാനമായുള്ള പൗരസ്ത്യ കല്‍ദായ സുറിയാനി സഭയുടെ ഇന്ത്യയുടെ പരമാധ്യക്ഷനായി മാര്‍ ഔഗിന്‍ കുര്യാക്കോസിന്റെ സ്ഥാനാരോഹണം നാളെ നടക്കും. തൃശൂര്‍ മാര്‍ത്ത് മറിയം വലിയപള്ളിയില്‍ പാത്രിയാര്‍ക്കിസ് ആവ ത്രിതീയന്‍ മുഖ്യകാര്‍മികനാകും. പ്രായാധിക്യംമൂലം മാര്‍ അപ്രേം മെത്രാപ്പോലീത്ത വിരമിക്കുന്ന ഒഴിവിലാണു നിയമനം.

◾ഇരിങ്ങാലക്കുട മുരിയാട് എംപറര്‍ ഇമ്മാനുവല്‍ വിശ്വാസ സമൂഹകേന്ദ്രത്തിലെ ആള്‍ക്കൂട്ട മര്‍ദ്ദനത്തിന് അറസ്റ്റിലായ പതിനൊന്ന് സ്ത്രീകളെ റിമാന്‍ഡു ചെയ്തു. എംപറര്‍ ഇമ്മാനുവല്‍ വിശ്വാസികളാണ് ഇവര്‍. സഭാബന്ധം ഉപേക്ഷിച്ച മുരിയാട് സ്വദേശി ഷാജിയെ സ്ത്രീകളുടെ സംഘം മര്‍ദിച്ചിരുന്നു. ആള്‍ക്കൂട്ട മര്‍ദനത്തിന്റെ ദൃശ്യങ്ങള്‍ പുറത്തായിരുന്നു. കാറില്‍ സഞ്ചരിക്കുകയായിരുന്ന മുരിയാട് പ്ലാട്ടോത്തത്തില്‍ ഷാജി, മകന്‍ സാജന്‍, ഭാര്യ ആഷ്ലിന്‍, ബന്ധുക്കളായ എഡ്വിന്‍, അന്‍വിന്‍ തുടങ്ങിയവര്‍ക്കാണ് മര്‍ദ്ദനമേറ്റത്.

◾മദ്യലഹരിയില്‍ പൊലീസുകാരന്‍ ഓടിച്ച വാഹനം ഇടിച്ച് ബൈക്ക് യാത്രക്കാരനു പരിക്ക്. പനമരം സ്റ്റേഷനിലെ പോലീസുകാരന്‍ ഇടിച്ചു തെറുപ്പിച്ചശേഷം നിര്‍ത്താതെ പോയെന്ന് കമ്പളക്കാട് പുലര്‍വീട്ടില്‍ സിയാദ് (38) കമ്പളക്കാട് പൊലീസ് സ്റ്റേഷനില്‍ പരാതി നല്‍കി.

◾ഗോവയില്‍ ഓണ്‍ലൈന്‍ ചൂതാട്ടത്തില്‍നിന്നു വന്‍ലാഭം വാഗ്ദാനം നല്‍കി ലക്ഷക്കണക്കിനു രൂപ തട്ടിയെടുത്ത കേസില്‍ മുഖ്യപ്രതികളെ പൊലീസ് പിടികൂടി. വാട്‌സ് ആപ്പ് ഗ്രൂപ്പില്‍ ആയിരക്കണക്കിന് ആളുകളെ ചേര്‍ത്ത് തട്ടിപ്പു നടത്തിയ പൊന്‍മള സ്വദേശി പുല്ലാനിപ്പുറത്ത് മുഹമ്മദ് റാഷിദ്(32), ഭാര്യ മാവണ്ടിയൂര്‍ സ്വദേശിനി പട്ടന്‍മാര്‍തൊടിക റംലത്ത് (24)എന്നിവരാണ് മങ്കട പോലീസിന്റെ പിടിയിലായത്.

◾തൃശൂര്‍ മച്ചാട് വനത്തില്‍ വനം കൊള്ളക്കാര്‍ 22 ചന്ദന മരങ്ങള്‍ മുറിച്ചു കടത്തി. മൂപ്പെത്താത്ത മരമായതിനാല്‍ മിക്കതും മുറിച്ചശേഷം ഉപേക്ഷിച്ചു. മരം മുറിക്ക് പിന്നില്‍ കഴിഞ്ഞ മാസം അറസ്റ്റിലായ സേലം സ്വദേശികളെന്നാണ് സംശയം. വിറക് ശേഖരിക്കാന്‍ പോയ നാട്ടുകാരാണ് മരം മുറിച്ചു കടത്തിയ വിവരം വനംവകുപ്പിനെ അറിയിച്ചത്.

◾വിദ്യാര്‍ത്ഥിയെ മര്‍ദിച്ചു പരിക്കേല്‍പിച്ച അധ്യാപകനെതിരേ കേസ്. കോഴിക്കോട് കൊടിയത്തൂര്‍ പിടിഎംഎച്ച് സ്‌കൂളിലെ ഒന്‍പതാം ക്ലാസ് വിദ്യാര്‍ത്ഥി മാഹിനാണ് പരിക്കേറ്റത്. അറബിക് അധ്യാപകന്‍ കമറുദ്ദീനെതിരെ മുക്കം പോലീസ് കേസെടുത്തു.

◾ഷൂ ധരിച്ചെത്തിയതിന് മുതിര്‍ന്ന വിദ്യാര്‍ത്ഥികളുടെ മര്‍ദ്ദമേറ്റ് ജൂനിയര്‍ വിദ്യാര്‍ത്ഥി ആശുപത്രിയിലായി. പാവറട്ടി വെന്മേനാട് എം എ എസ് എം ഹയര്‍ സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ത്ഥി നിഹാലിനാണ് മര്‍ദ്ദനമേറ്റത്. ഇടത് കണ്ണിനു മുകളില്‍ പരിക്കുണ്ട്.

◾അയോധ്യയിലെ രാമക്ഷേത്രം അടുത്ത വര്‍ഷം തുറക്കുമെന്നു പ്രഖ്യാപിക്കാന്‍ അമിത് ഷാ ആരാണെന്ന് കോണ്‍ഗ്രസ് അധ്യക്ഷന്‍ മല്ലികാര്‍ജുന ഖാര്‍ഗെ. ക്ഷേത്ര ഭാരവാഹികള്‍ പ്രഖ്യാപിക്കേണ്ട ജോലി ആഭ്യന്തര മന്ത്രിയാണോ ചെയ്യുന്നത്. അഭ്യന്തര മന്ത്രി അദ്ദേഹത്തിന്റെ ജോലി ചെയ്യണം. രാജ്യത്തിന്റെ ആഭ്യന്തര സുരക്ഷ ഉറപ്പാക്കുന്ന ജോലി ചെയ്യൂവെന്നും ഖാര്‍ഗെ പറഞ്ഞു.

ഡല്‍ഹി കോര്‍പറേഷന്‍ മേയര്‍ തെരഞ്ഞെടുപ്പ് മാറ്റി വച്ചു. 

◾ഡല്‍ഹി കോര്‍പറേഷന്‍ മേയര്‍ തെരഞ്ഞെടുപ്പ് മാറ്റി വച്ചു. പുതിയ തീയതി പിന്നീട് പ്രഖ്യാപിക്കും. തെരഞ്ഞെടുക്കപ്പെട്ട അംഗങ്ങള്‍ക്ക് മുന്‍പ് ഗവര്‍ണര്‍ നാമനിര്‍ദേശം ചെയ്ത പത്ത് അംഗങ്ങളുടെ സത്യപ്രതിജ്ഞ നടത്തിയതിനെതിരെ ആപ് കൗണ്‍സിലര്‍മാര്‍ പ്രതിഷേധിച്ചു ബഹളം വച്ചതോടെ യോഗം സംഘര്‍ഷത്തില്‍ കലാശിച്ചതോടെയാണ് മേയര്‍ തെരഞ്ഞെടുപ്പു മാറ്റിവച്ചത്.

◾ഡല്‍ഹി കോര്‍പറേഷനിലേക്ക് പത്ത് അംഗങ്ങളെ ഗവര്‍ണറല്ല, ഡല്‍ഹി സര്‍ക്കാരാണു നാമനിര്‍ദേശം ചെയ്യേണ്ടതെന്ന് മുഖ്യമന്ത്രി അരവിന്ദ് കേജരിവാള്‍. ജനവിധി ഗവര്‍ണര്‍ നടപ്പാക്കണമെന്ന് ആവശ്യപ്പെട്ട് കേജ്രിവാള്‍ ഗവര്‍ണര്‍ക്കു കത്തയച്ചു.

◾ബംഗളുരു വിമാനത്താവള പാതയില്‍ വാഹനങ്ങളുടെ കൂട്ടയിടി. ഒമ്പതു വാഹനങ്ങള്‍ തകര്‍ന്നു. ലോഡുമായി അമിതവേഗതയില്‍ വന്ന ട്രക്ക് നിയന്ത്രണം വിട്ടതാണ് അപകടത്തിനു കാരണം.

◾നിധി കിട്ടിയെന്ന വ്യാജേന മുക്കുപണ്ടം നല്‍കി വ്യാപാരികളില്‍നിന്നു ലക്ഷങ്ങള്‍ തട്ടിയെടുത്ത മൈസൂര്‍ സ്വദേശികളായ ദേവ, രാജീവ് എന്നിവര്‍ തമിഴ്നാട്ടില്‍ അറസ്റ്റിലായി. മയിലാടുതുറ പ്രദേശത്തെ വ്യാപാരികളെ കബളിപ്പിച്ച് ലക്ഷക്കണക്കിന് രൂപയാണ് ഇവര്‍ കവര്‍ന്നത്. ഒരു ലക്ഷം മുതല്‍ അഞ്ച് ലക്ഷം വരെ വിവിധ വ്യാപാരികളില്‍ നിന്നായി ഇവര്‍ ഇങ്ങനെ തട്ടിച്ചു.

◾ന്യൂയോര്‍ക്ക്- ഡല്‍ഹി എയര്‍ഇന്ത്യ വിമാനത്തില്‍ സഹയാത്രികയുടെ ദേഹത്തു മൂത്രമൊഴിച്ച കേസിലെ പ്രതി ശങ്കര്‍ മിശ്ര വ്യവസായിയല്ല, അമേരിക്കന്‍ കമ്പനിയിലെ വൈസ് പ്രസിഡന്റാണ്. അവധിയെടുത്ത ഇയാളെ കമ്പനി പുറത്താക്കി. ഇയാളെ ബംഗളൂരുവില്‍ പോലീസ് തെരയുന്നു.

◾വിമാനത്തില്‍ മോശമായി പെരുമാറുന്ന യാത്രക്കാരെ വേണ്ടിവന്നാല്‍ വിമാനത്തില്‍ കെട്ടിയിടാമെന്ന് ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍. വിമാനക്കമ്പനികള്‍ക്കു നല്‍കിയ സര്‍ക്കുലറിലാണ് ഈ നിര്‍ദേശം.

ദത്തുപുത്രികളുമായി ചീഫ് ജസ്റ്റിസ് കോടതിയിൽ എത്തി.

◾ചീഫ് ജസ്റ്റീസ് ഡി.വൈ. ചന്ദ്രചൂഡിന്റെ പെണ്‍മക്കള്‍ സുപ്രീം കോടതിയില്‍. ഭിന്നശേഷിക്കാരായ രണ്ടു ദത്തുപുത്രികളുമായാണ് ചീഫ് ജസ്റ്റിസ് ഇന്നലെ കോടതിയില്‍ എത്തിയത്. കോടതിയും കോടതി നടപടികളും കാണിച്ചുതരണമെന്ന് ആവശ്യപ്പെട്ടതിനാലാണ് ദത്തുമക്കളായ പ്രിയങ്ക (20), മഹി (16) എന്നിവരെ കൊണ്ടുവന്ന് കോടതി സംവിധാനം കാണിച്ചുകൊടുത്തത്.

◾ഐഎസ്എല്ലില്‍ ബംഗളൂരു എഫ്‌സിക്ക് വിജയം. നോര്‍ത്ത്ഈസ്റ്റ് യുണൈറ്റഡിനെ ഒന്നിനെതിരേ രണ്ട് ഗോളുകള്‍ക്ക് തകര്‍ത്താണ് ബംഗളൂരു ജയം സ്വന്തമാക്കിയത്.

◾ശ്രീലങ്കക്കെതിരായ ടി20 പരമ്പരയിലെ മൂന്നാം മത്സരം ഇന്ന്. ആദ്യ മത്സരത്തില്‍ ഇന്ത്യ ജയം സ്വന്തമാക്കിയപ്പോള്‍ രണ്ടാമത്തെ മത്സരം ശ്രീലങ്കക്കൊപ്പമായിരുന്നു. മൂന്ന് മത്സരങ്ങളുള്ള പരമ്പരയിലെ ഇന്നത്തെ മത്സരം ഏറെ നിര്‍ണായകമാണ്.

NIRMAL  Result 07/01/202

KARUNYA Result 07/01/2023

1 st Prize :

Amount: ₹80,00,000/-

KX225885  

Consolation Prize :

Amount: ₹8,000/-

KN225885 KO225885 KP225885 KR225885 KS225885 KT225885 KU225885 KV225885 KW225885 KY225885 KZ225885  

2 nd Prize :

Amount: ₹5,00,000/-

KW755406  

3 rd Prize :

Amount: ₹100,000/-

KN688850 KO904578 KP443030 KR730409 KS880655 KT216155 KU840837 KV155510 KW800404 KX174910 KY110558 KZ789676  

4 th Prize :

Amount: ₹5,000/-

0422 0672 1155 1429 2376 2439 3284 4135 4306 4350 5164 5826 6272 6513 7578 7928 8828 9812  

5 th Prize :

Amount: ₹2,000/-

0418 1208 1916 3800 4856 6129 7203 7626 9541 9703  

6 th Prize :

Amount: ₹1,000/-

1508 1702 3783 4248 4561 4957 5020 5315 5697 5808 6098 7419 8149 9025  

7 th Prize :

Amount: ₹500/-

0063 0356 0556 0780 0783 0794 0955 1054 1084 1226 1266 1313 1606 1650 1956 2010 2154 2529 2621 2684 2736 2889 2984 2997 3016 3100 3164 3492 3593 3654 3659 3668 3696 3720 3739 3806 3852 3855 3966 4025 4044 4319 4381 4496 4803 4852 4998 5155 5381 5867 5987 6054 6699 6905 7024 7095 7356 7388 7533 7571 7756 7757 7761 7858 7878 7920 8012 8022 8211 8252 8396 8401 8613 9003 9059 9132 9238 9247 9561 9745  

8 th Prize :

Amount: ₹100/-

0108 0254 0371 0470 0485 0516 0569 0835 0902 0908 0911 0942 1027 1030 1214 1248 1310 1337 1371 1467 1541 1550 1716 1732 1796 2128 2265 2402 2427 2465 2468 2516 2527 2651 2778 2881 2896 2914 3048 3051 3096 3112 3204 3248 3533 3651 3790 3931 3967 4024 4049 4075 4096 4137 4249 4380 4410 4458 4642 4842 4889 4912 5138 5182 5243 5429 5431 5441 5622 5648 5736 5741 5927 5993 6005 6014 6116 6173 6278 6497 6501 6672 6704 6837 6902 7053 7119 7153 7211 7226 7369 7400 7409 7651 7665 7677 7794 7860 8145 8278 8317 8416 8431 8468 8533 8692 8790 8900 9043 9146 9190 9214 9229 9375 9417 9443 9569 9647 9697 9751 9753 9935 9967 9987  

Type settings-KURIAKOSE NIRANAM